Posts

Showing posts from October, 2016

ഞാൻ

എപ്പോഴും ഉള്ളത് "ഞാൻ" എന്ന തോന്നൽ മാത്രമാണ് എന്ന് അദ്വൈതികൾ പറയും.  ഉണർന്നിരിക്കുമ്പോൾ ശരീരവും മനസ്സും ഈ തോന്നലും ഉണ്ട്.  സ്വപ്നത്തിൽ ശരീരമില്ല്യ, മനസ്സും ഈ തോന്നലും ഉണ്ട്.  പൂർണ നിദ്രയിലോ ഈ തോന്നൽ മാത്രം.  അങ്ങിനെയാണത്രെ.  ഈ തോന്നൽ ഉണ്ടെന്ന് സമർത്ഥിക്കാൻ ഉപയോഗിക്കുന്ന ന്യായം ഇതാണ് - ഉറങ്ങി എഴുന്നേൽക്കുമ്പോൾ, സുഖമായി ഉറങ്ങി എന്ന്  തോന്നുന്നത്, ഉറങ്ങുമ്പോളും ആ തോന്നൽ (ഞാൻ എന്ന തോന്നൽ) ഉള്ളതിനാൽ ആണത്രേ.  അതെനിക്ക് അത്ര ബോധ്യമായീല്ല്യ.  ഏറ്റവും സുഖമായ നിദ്ര ഉറങ്ങിയിട്ടുള്ളവനാണ് ഞാൻ - anesthesia.  ശരീരം കീറി മുറിക്കുമ്പോളും ഒരു വേദനയും അറിയാത്ത സുഖമായ നിദ്ര.  എന്നാൽ ആ സുഖ നിദ്ര കഴിഞ്ഞുണർന്നപ്പോൾ വേദന മാത്രമേ എനിക്ക് തോന്നിയുള്ളൂ.  സുഖമായി ഉറങ്ങി എന്ന് തോന്നിയതേ ഇല്ല്യ.  സുഖമായി ഉറങ്ങി എന്ന് തോന്നുന്നതിന്റെ ന്യായം ഇപ്രകാരമാണ് - "ഇപ്പോൾ എനിക്ക് സുഖമാണ്.  ഉറക്കത്തിന് മുൻപേ ക്ഷീണം ഉണ്ടായിരുന്നു.  ഉറക്കം ശരിയായിരുന്നില്ല്യങ്കിൽ ഇപ്പോൾ സുഖാമാവുമായിരുന്നില്ല്യ.  അപ്പോൾ ഉറക്കം സുഖാമായി കാണും".  ഇതാണെന്റെ അഭിപ്രായം.  നിങ്ങൾക്കെന്ത് തോന്നുന്നു?

അഹങ്കാരം

തെണ്ടേണ്ടി വന്നതിൽ ദുഃഖമുണ്ടായേറ്റം
എൻ അഹങ്കാരം നന്നേ വൃണപ്പെട്ടുപോയ്
തുട്ടുകൾ കിട്ടി തുടങ്ങിയ നേരത്ത്
കിട്ടണം കിട്ടണം എന്ന ആഗ്രഹമായ്
തെണ്ടികളിലഹം ഒന്നാമനാകിടും
എന്നൊരഹങ്കാരം ഉള്ളിൽ മുളച്ചുപോയ്
എത്രയും ചിത്രം വിചിത്രം അഹങ്കാരം
രക്ഷപെടാനുള്ള കഷ്ടമോ അപാരം